لا حياااة بدون قهوه ( القهوه العربيه )

السلام عليكم ورحمة الله وبركاته

بسم الله الرحمن الرحيم

اليوم جايب لكم شلون تحضير وتقديم القهوه العربيه

في البدايه لازم نذكر انواع القهوه الجيده ومكونات القهوه:

*اجود انواع القهوه هو البريه والهرري والخولانيه..
ومتوفره بالسوق..
*الهيل والفاخر منه يبين بالريحه وحجم الحبه..طبعا الغالي سعره فيه..
*الزعفران..امممممم ما ادري بس اهل الامارات ماشاء الله عندهم زعفران قمة واعتقد انه ايراني..
*والقرنفل (المسمار)



ادوات التحضير في البر(الاغلب استغنى عنها الان ان لم يكن الكل)..
*المحماس: وفيها نحمس او نحمص البن..
*المبرادة : وهي اله او قطعه خشبيه فيها يتم تبريد البن بعد حمسه·
*النجر أو المهباش"عند اهل الشمال" : ويستخدم لطحن القهوة والهيل والقرنفل·
*دلة التفويح: تطبخ بها القهوة·
*دلة التبهير والتقديم: وفيها نبهر القهوه ونزلها قبل التقديم
*الخلبه(الليف):هو الذي يحجب الهيل من النزول في الفنجان عند تقديمه

: :

التحضير:
*اولا تحميص البن..
اكيد تحميصه في البر يكون على الحطب وهو سر تميز القهوه في المكاشيت..
واحسن شي انك تسوي قهوة كل دله في وقتها..

تحمص القهوه مع التحريك الى ان تصل الى درجه بني
ما يحتاج نقول ان سبب التحريك هو عشان ما يحترق بعض الحب والبعض الثاني يكون نص استوا والثالث ني (كبده مو قهوه)..

بعدين جب لك نجر وكمخ في القهوه الين تصير شبه ناعمه
اذا كانت ناعمه بتتطاير في موية القهوه واذا خشنه بتعذبك في اعدادها..

بعدين حط الهيل في النجر(بعد ما تطلع القهوه) ودق لك كم حبه دق الله راس شارون..

المهم لازم يكون معك دلتين وحده للتفويح والثانيه تزل فيها القهوه..

حقت التفويح خل الماء فيها الى ان يغلي اذا غلى ارفعها عن النار وحط لك قهوه على حسب حجم الدله..

خلها على نار هاديه لين تدوخ من الطبخ
يعني بعد سبع دقايق من التقلب والدوخه..
خل القهوه تركد شوي عشان ما ينزل الحب معها في دله التقديم




التقديم..
حط ملعقة صغيره من الهيل في قاع الدله وشوي زعفران<<نوع الزعفران يحدد الكميه اذا كان الزعفران درجه اولى ما يحتاج الا القليل..(الباديه واهل المحافظات والقرى في نجد يتعبرون كثرة الهيل من الكرم)
والحين هط الخلبه بدله التفويح وصب القهوه بدلة التقديم
واذ صبيت القهوه في الدله التقديم حط به خلبه ..واذا كنت في البر ونسيته يا كسرة حطبه او ملعة مقلوبه..
وكذا تصير القهوه جاهزه..

تقديم القهوه عند الرجال:
<<<<انواع التعقد من هالشي..
اكيد التمر موجود بانواعه..
ومن اشهر انواعه السكري والخلاص..

بعض الناس يحبون التمر مع القشطه او اللبنه او الطحينه..

بس شلون تصب القهوه؟؟

الكثير من قبائل وحمايل نجد(والسعوديه) يهتمون لهذا الامر اشد الاهتمام..
فمن المخجل والمعيب ان يقدم القهوه شخص غريب(يعني هندي اوقهوجي ومرات احد خارج افراد البيت) (بس الناس سمحين الان)..
اضافة الى ان الدله يجب ان تكون ثابته في اليد ومو تلعب بيدك

يعني اكيد الدله باليد اليسار والفناجيل باليمين(ماشاء الله)..والدله ما تهتز باليد..
الفنجال اذا جيت تصب القهوه لا تملاااااااااااه والا ترى الفنجال يبي يلعب على جبهتك..
لانه باعتقادهم اذا مليت الفنجال فهي طرده يعني خل القهوه في قاعة الفنجال

وهنا فيه عاده عند بعض اللي هي يطق الفنجان بالدله

وبعضهم اذا طقيت الفنجان بالدله ما يشرب


ولاتنس وانا اخوك وانت تصب لاتصير ساكت بس..
لا قم حيي بالعالم وقل وانت تصب ياهلا ويامرحبا تو مانور المكان اسفرت وانورت يالله حيه هذي الساعة المباركه ومن هالكلام اللي يحبب النفوس(الحمدلله على نعمة الاسلام اللي وصانا بالكلمه الطيبه)..
ايه تذكرت لا جيت تصب السنه انك تبدا من اليمين الى اليسار..
لكن العادات والتقاليد انك تبدا من الاكبر

وسلامتكم

احنا قهوتنا ماتختلف كثير من قهوتكم بس طبعا قهوتكم اطعم بصراحه
في وقتها يتحمص البن شي لذيذ
اما طريقة التقديم مثل طريقتنا تماما

يسلموا قوقو على المرووور


والحمد لله اعجبتس الطريقه

وش يدريتس ان قهوتنا اطعم؟؟؟

بعدين وشلون يعني تسووون القهوه ؟؟

زياده تثقيف

تصدقون معرف كيف اسوي قهوه شاهي ويخب علي

رحت الرياض ودقت القهوه على اصولها
واحنا قهوتنا مانكثر فيها هيل يعني خير الامور اوسطها
ومانحط قرنفل ومانحمص البن في وقتها
اما الطريقه مثل طريقتنا بس مانحط هيل في قاع دلة التقديم

ااهاااااا


<<<<روقان على القهوه